Այս պատմությունը վերաբերում է 2009 թվականին տեղի ունեցած սպանության դեպքի, որը ցնցրեց հայկական բիզնես շրջանակներին։
Պատմությունը սկսվում է 2009 թվականի ապրիլի 25-ի երեկոյան, երբ անհետանում է ԱՄՆ քաղաքացի, «Լիլ-Նար» փակ բաժնետիրական ընկերության տնօրեն, 1951 թվականին ծնված Նազարեթ Հագոփ-Բերբերյանը։
Նրա անհետացումից հետո իրավապահ մարմինները սկսում են հետախուզում։ Շուտով հայտնաբերվում է նրա «Տոյոտա» մակնիշի ջիպը՝ «Զվարթնոց» օդանավակայանի ավտոկանգառում։ Որոշ ժամանակ անց, մոտ 20 օր հետո, Երևան-Սևան մայրուղու 25,5 կմ հատվածում՝ ճամփեզրի ձորակում, հայտնաբերվում է գործարարի դին։
Հետաքննության ընթացքում պարզվում է, որ սպանությունը կատարվել է խեղդամահ անելու և «Կետամին» դեղամիջոց ներարկելու միջոցով։ Գործի դրվագները ցնցող են՝ հանցագործները դին տեղափոխել են նույն գործարարի ավտոմեքենայով, իսկ մեքենան թողել օդանավակայանի տարածքում՝ ստեղծելով տպավորություն, թե Բերբերյանը մեկնել է արտերկիր։
Սպանության գործով մեղադրյալի աթոռին հայտնվում են երեք անձինք՝ 1982 թվականին ծնված Գևորգ Բադալյանը, Պետրոս Թեմիրյանը և Կարեն Դալլաքյանը։ Դատարանը նրանց բոլորին մեղավոր է ճանաչում՝ որպես կազմակերպված խմբի անդամներ, որոնք շահադիտական դրդումներով սպանել են Նազարեթ Բերբերյանին՝ նրա առանձնապես խոշոր չափերով ունեցվածքը հափշտակելու նպատակով։
