ՀՀ գլխավոր դատախազությունը պահանջում է Բագրատ սրբազանին վերադարձնել պետությանը Տավուշի մարզի Նավուր գյուղում գտնվող հատուկ նշանակության հողատարածքը և վրա կառուցված շինությունները, այդ թվում՝ զորանոցը։
Ըստ դատախազության՝ 2023 թվականի հունիսի 9-ին սկսված քրեական վարույթի շրջանակում պարզվել է, որ պաշտպանության նախարարությանն անհատույց օգտագործման տրված՝ Նավուր գյուղի 2-րդ փողոցի 1-ին նրբանցքում գտնվող 1198.09 քառակուսի մետր մակերեսով անշարժ գույքը, որի մեջ մտնում են զորանոցը (621.81 քմ), բնակելի շինությունը (121.77 քմ), քարե շինությունը (66.16 քմ), ճաշարանը (225.7 քմ), պահեստը (39.65 քմ), փայտե տնակը (48 քմ), լոգարանը (27 քմ) և հատուկ նշանակության 6.0536 հեկտար հողամասը, 2014 թվականի հուլիսի 24-ի պայմանագրով օտարվել է Ա. Ս.-ին։
Հետագայում, 2017 թվականի հուլիսի 17-ին, Ա. Ս.-ն նշված հողատարածքը և շինությունները, այդ թվում՝ զորանոցը, ընդամենը 400.000 դրամով օտարել է Վ. Գ.-ին։ Կառավարությանն առընթեր անշարժ գույքի կադաստրի պետական կոմիտեի կողմից տրված միասնական տեղեկանքի և Վ. Գ.-ի սեփականության իրավունքի պետական գրանցման վկայականի ուսումնասիրությամբ պարզվել է, որ օտարված հողամասն օտարման պահին և առայսօր, ըստ նպատակային նշանակության, հանդիսանում է հատուկ նշանակության հողամաս։
Բագրատ սրբազանի փաստաբան Տաթեւիկ Սողոյանը նշել է, որ այս գործը վերաբերում է Տավուշի սահմանամերձ Նավուր գյուղում գտնվող հողատարածքին, որը 9 տարի առաջ երրորդ անձից փոխանցվել է սրբազանին։ Այնտեղ սրբազանի ընկերների համատեղ ջանքերով և վարկային միջոցների ներգրավմամբ կառուցվել է գյուղատնտեսական ֆերմա և մսամթերքի արտադրություն՝ առաջնահերթ համայնքի զբաղվածության հարցը լուծելու նպատակով։ 2020 թվականի քովիդի և պատերազմի ճգնաժամի հետևանքով ֆերմայի գործունեությունը կասեցվել է, իսկ վարկային միջոցների սպասարկման բեռը դեռևս կրում է Բագրատ սրբազանը։
2023 թվականին դատախազությունը դիմել է դատարան՝ պահանջելով անվավեր ճանաչել այն գործարքը, որով 2014 թվականին հողատարածքն օտարվել էր պետությունից երրորդ անձին, և վերադարձնել այդ գույքը պետությանը։ Բագրատ սրբազանը՝ որպես բարեխիղճ ձեռքբերող, և «Տավուշ էկո միթ» ընկերությունը՝ որպես ներդրում իրականացրած ձեռնարկություն, ներգրավվել են որպես երրորդ անձինք։
Հակակոռուպցիոն դատարանի 2025 թվականի դեկտեմբերի վճռով հայցը մերժվել է՝ հայցային վաղեմության ժամկետը լրանալու հիմքով։ Այդուհանդերձ, դատախազությունը բողոքարկել է վճիռը։ Ըստ փաստաբանի՝ հասկանալով, որ այդ գործը հեռանկար չունի, դատախազը չի սպասել վերաքննիչ դատարանի որոշմանը և կրկին հայցել է դատարան՝ նույն հարցը, ավելի ճիշտ՝ նույն նպատակը՝ Բագրատ սրբազանին ունեզրկելը։
Նավուր գյուղի բնակիչների տեղեկացմամբ՝ այդ տարածքը խորհրդային տարիներին եղել է հակակարկտային կայան, իսկ Հայաստանի անկախացումից հետո դարձել է զորամաս, որը հետո դադարել է գործել այդ տարածքում։ Գլխավոր դատախազության հաղորդագրության մեջ նշված Ա․ Ս․-ն, որին 2014 թվականին օտարվել է հողատարածքը, եղել է այդ զորամասի հրամանատարը։
