ՀՀ հակակոռուպցիոն կոմիտեի կողմից իրականացված լայնածավալ միջոցառումների արդյունքում փաստական տվյալներ են ստացվել, որոնք վկայում են ընտրակաշառքի հանցագործություն կազմակերպելու փաստի մասին։
Ընտրակաշառքը նպատակադրվել էր բաժանել ՀՀ Արմավիրի մարզի Վաղարշապատ համայնքում տեղի ունեցած ավագանու ընտրություններին իրենց օգտին քվեարկելու համար։ Հանցավոր մտադրությունը կյանքի կոչելու նպատակով խմբի անդամները հավաքագրել են հիմնականում Հայաստանի հանրապետական կուսակցության անդամների, ովքեր ունեին լայն կապեր և բազմաթիվ ծանոթներ հանրության շրջանում։ Արդյունքում՝ հինգ տասնյակից ավելի անձանց խոստացել են 50․000 դրամի չափով ընտրակաշառք՝ պայմանով, որ ընտրություններին քվեարկեն «Հայրենիք» կուսակցության թեկնածուի օգտին։
Հանցանքն ավարտին հասցնելու և գործընթացն ամբողջապես վերահսկելու համար խմբի անդամները կատարել են դերերի հստակ բաշխում, կազմել են հավաքագրված ընտրողների ցուցակներ և ընտրության օրը հեռախոսակապի միջոցով կառավարել են իրենց ենթակա քաղաքացիների գործողությունները։
ՀՀ հակակոռուպցիոն կոմիտեի կատարած խուզարկությունների արդյունքում հայտնաբերվել և առգրավվել են փաստաթղթեր, որոնցում ձեռագիր գրառումներ են կատարվել ընտրակաշառք ստանալու առաջարկն ընդունած և ընտրակաշառք տալուն օժանդակած անձանց վերաբերյալ։ Բացի այդ, առգրավվել են ընտրողների և ընտրատեղամասերի վերաբերյալ ցուցակներ։
Այս գործով քրեական վարույթի շրջանակում ձերբակալվել և հանրային քրեական հետապնդումներ են հարուցվել 62 անձանց նկատմամբ։ Որոշ մեղադրյալներ իրենց մեղավոր են ճանաչել և տվել խոստովանական ցուցմունքներ։ Մեղադրյալներից մի մասի նկատմամբ վարույթն անջատվել է և մեղադրական եզրակացությամբ ուղարկվել է դատարան։
