Այսօր՝ փետրվարի 11-ին, Արմավիրի մարզում տեղի է ունեցել ողբերգական ավտովթար, որի հետևանքով մեկ մարդ մահացել է, իսկ երկու մարդու տարբեր աստիճանի մարմնական վնասվածքներով տեղափոխվել են «Արմավիր» բժշկական կենտրոն։
Դեպքը տեղի է ունեցել ժամը 21։10-ի սահմաններում Ալաշկերտ-Արմավիր ավտոճանապարհի հատվածում, որտեղ բախվել են «Nissan Altima» և «Ford Fusion» մակնիշի ավտոմեքենաները։
Վթարի վայրում առաջինը հասել են քաղաքացիները, որոնք օպերատիվորեն օգնության են կանչել ՀՀ Ներքին գործերի նախարարության փրկարար ծառայության Արմավիրի հրշեջ փրկարարական ջոկատը՝ մարզային փրկարարական վարչության պետ Գևորգ Հակոբյանի և ջոկատի հրամանատար Ռոման Գրիգորյանի գլխավորությամբ։ Փրկարարները վիրավորներին մոտեցրել են սպասարկման մեքենաներին, իսկ բժիշկները տեղում առաջին բուժօգնություն են ցուցաբերել մինչև հիվանդանոց տեղափոխելը։
Դեպքի վայր է ժամանել նաև ՀՀ ՆԳՆ ոստիկանության քրեական ոստիկանության գլխավոր վարչության Արմավիրի մարզային վարչության պետ Երվանդ Նիկոյանը։
Տարածքը սահմանազատել են ՀՀ ՆԳՆ ոստիկանության Պարեկային ծառայության Արմավիրի մարզի գումարտակի 2-րդ վաշտի 1-ին դասակի պարեկները՝ գումարտակի հրամանատար Վանիկ Սաղոյանի, գումարտակի հրամանատարի տեղակալ Արմեն Մուրադյանի և վաշտի հրամանատար Արթուր Զիրոյանի գլխավորությամբ։
Վթարի մասին տեղեկությունը փոխանցվել է ՀՀ Քննչական կոմիտեի Արմավիրի մարզային քննչական վարչություն, որտեղից ժամանել է քննչական խումբը՝ վարչության պետ Սևակ Խաչատրյանի, վարչության պետի տեղակալ Արտակ Ղազարյանի և օրվա հերթապահ քննիչի գլխավորությամբ։
Մինչև տարածքի սահմանազատումը, ոստիկանության Արմավիրի բաժինը հիվանդանոցից ահազանգ է ստացել, որ վիրավորներից մեկը գիտակցության չգալով՝ մահացել է։
Դեպքի փաստով քննչական վարչությունում նախաձեռնվել է քրեական վարույթ, որի շրջանակում պարզվում են ավտոմեքենաների սեփականատերերի, վարորդների, մահացածների և վիրավորների ինքնությունը։
