ՀՀ հակակոռուպցիոն դատարանում այսօր շարունակվում է քաղաքապետ Վարդան Ղուկասյանի և Գյումրու գլխավոր ճարտարապետ Հենրիկ Գասպարյանի գործը, որոնք մեղադրվում են 4 միլիոն դրամ կաշառք ստանալու մեջ։
Դատական նիստի ընթացքում դատարանը փորձեց հարցաքննել Հենրիկ Գասպարյանին, սակայն նա կտրականապես հրաժարվեց ցուցմունք տալ։ Նա մի քանի անգամ կրկնեց՝ «Չեմ պատասխանում ոչ մի հարցի, ցուցմունք չեմ տալու»։
Դատախազը դատարանին ներկայացրեց Հենրիկ Գասպարյանի նախաքննական ցուցմունքները։ Ըստ դրանց՝ 71-ամյա ճարտարապետը, որը, ինչպես նշվեց, ունի սիրտի բարդ հիվանդություններ (ստենտավորված սիրտ, անցյալում եղած ինֆարկտ), արդեն հոկտեմբերի 20-ին, երբ ոստիկանությունը ցուցադրական ձևով ձերբակալեց նրան և Վարդան Ղուկասյանին, հրաժարվել էր ցուցմունք տալ՝ հայտարարելով, որ «հուզված է և չի կարող ցուցմունք տալ ինձ առաջադրված մեղադրանքի մասին»։
Հարցաքննության ընթացքում նա նաև նշել է, որ իր հարաբերությունները Վարդան Ղուկասյանի հետ «աշխատանքային բնույթ են կրում»։
Հետագայում, նոյեմբերին տեղի ունեցած հարցաքննության ժամանակ Հենրիկ Գասպարյանը նույնպես հրաժարվել է ցուցմունք տալ՝ պատճառաբանելով, որ «ծանոթացել է մեղադրանքին և դեռ չի մարսել ամբողջությամբ»։ Նա նշել է, որ կանդրադառնա դրան՝ ավելի լիարժեք պատկերացում ձեռք բերելուց հետո։
Այսօր, դատարանում նա կրկին հրաժարվեց ցուցմունք տալ՝ պնդելով, որ «չի մարսել փաստաթղթաշրջանառությունը»։
Դատական նիստի ընթացքում տեղի է ունեցել առերեսում գործարար Սևակ Գոմցյանի և Հենրիկ Գասպարյանի միջև։ Ճարտարապետը հրաժարվեց ցուցմունք տալ Սևակ Գոմցյանի հարցերին, նշելով, որ «չի ուզում ոչինչ պատասխանել»։
Նախքան Հենրիկ Գասպարյանին հարցաքննելը դատարանը լսեց գործարար Սևակ Գոմցյանին, որի հայտարարության համաձայն՝ Վարդան Ղուկասյանը և Հենրիկ Գասպարյանը, օգտագործելով իրենց պաշտոնական լիազորությունները, 4 միլիոն դրամ կաշառք են ստացել՝ նրա պատկանող առևտրի և սպասարկման համար նախատեսված կառույցը օրինականացնելու նպատակով։
