Իշխանական շրջանակներից հնչում է մի նոր, բայց միևնույն ժամանակ ծանոթ հնչողություն՝ «ահաբեկչական խմբի» մասին։ Սա վատ բեմադրություն է, այնքան վատ, որ նույնիսկ Ստանիսլավսկին հավանաբար կկասկանար։ Բայց, երբ այս կեղծ սպառնալիքի մասին խոսում է Էդմոն Մարուքյանը, դու հասկանում ես, որ նա տեսնում է մի բան ավելի՝ կադրից դուրս։ Նա ճանաչում է այն մարդկանց, ովքեր, իր կասկածի համաձայն, այս կեղծ շանտաժը են ստեղծել։ Նա գիտի նրանց մեթոդները, գիտի, որ նրանք կանեն այդպիսի բան՝ առանց վարանելու։ Եվ ես հավատում եմ Մարուքյանին, երբ նա ասում է․ «Չեմ հավատում ձեզ, սուտ եք խոսում, ուզում եք ատելության մեջ թաղեք հանրությանը, և միայն ձեր ձայնը լսվի»։
Իրականում, ոչ ոք էլ չի կարող հավատալ այս դիմակահանդեսին։ Ինչո՞ւ են «ահաբեկիչները» վտանգի տակ դնում իրենց ծրագրերը՝ անիմաստ վիդեոնկարահանման համար։ Ի՞նչ էր դա տալու իրենց պայքարին, բացի այն, որ հայրենասիրական տեքստը դարձնում են ահաբեկչական տեքստ, և հայրենիքի մասին մտահոգությունները դարձնում վտանգ ներկայացնող ու հետապնդելի։
Ահաբեկիչների համար ամենևին ձեռնտու չէ բացահայտել իրենց պլանները։ Դա չէր անի անգամ ամենահիմար ահաբեկիչը։ Իսկ արցախյան ակցենտով խոսող մարդիկ այդքան հիմար չեն կարող լինել։ Զարմանալի է, որ արցախցի մարդ է մասնակցում այդ թատերական խայտառակությանը, բայց մի՞թե արցախցիների մեջ չկան ներկա իշխանությանը պաշտպանողներ։ Կան, որքան էլ դա անհավատալի թվա։
Այս տեսագրության շրջանառությունը ձեռնտու է միայն մեկ քաղաքական ուժի՝ իշխողին։ Իր բացահայտ սպառնալիքները՝ «սատկացնելու ենք, կզզացնելու ենք» և այլն, կարողանան գործի դնել։ Սա՝ գործնականում։ Իսկ տեսականորեն՝ այս տեսանյութը հարմար է, որպեսզի արցախցի մեր եղբայրների ու քույրերի բերանը փակեն, ինչպես արդեն արեցին։ Դեռ տեսանյութը չտարածված՝ արդեն «արցախյան ակցենտը» դարձրեցին ահաբեկչական ակցենտ։ Սա լավ հնարավորություն կարող էր դառնալ բոլոր արցախցիներին վարկաբեկելու համար՝ ասելով՝ «Դուք ահաբեկիչ եք, ուզում եք իշխանություն զավթեք, անօրինական գործողություններ եք հրահրում», ու լավ առիթ կարող էր լինել զոհի դեր ստանձնելու համար, բայց չեղավ, քանի որ շարժապատկերը ցայտուն կեղծ է։
Համենայն դեպս, Մարուքյանը, օրինակ, ոչ մի կերպ դրան չի հավատում, ես էլ հավատում եմ Մարուքյանին։ Այսօր հիստերիան պատել է միայն իշխանական կողմին։ Նրանք դիմում են պլան B-ին, C-ին, D-ին, և դեռ հայտնի չէ, թե քանի պլան ունեն պահած առաջիկա 20 օրերին գործարկելու համար։ Բայց նրանք չունեն իշխանությունը զիջելու որևէ պլան, դա չի դիտարկվում իրենց կողմից, ուրեմն պատրաստ եղեք ամեն ինչի, քանի որ մեր առջև կանգնած են բացառապես ամեն ինչի պատրաստ մարդիկ։
