ՀՀ վարչապետ Նիկոլ Փաշինյանը Կառավարության նիստում հայտնել է, որ 2025 թվականի արդյունքներով առաջին անգամ Հայաստան վերադարձած ՀՀ քաղաքացիների թիվը գերազանցում է Հայաստանից մեկնած քաղաքացիների թիվը։
«Սա նշանակում է, որ 2025-ի արդյունքներով մենք արձանագրում ենք արտագաղթի փոխարինում ներգաղթով»,- ասել է վարչապետը՝ նշելով, որ այս փոփոխությունը դրական է։
Նա նաև ընդգծել է, որ զբոսաշրջային հոսքերի ծավալներն էլ են գերազանցել նախորդող տարիների ցուցանիշները։ Ըստ վարչապետի տեղեկությունների՝ 2025 թվականին օտարերկրյա քաղաքացիների ներհոսքը 23 հազարով գերազանցել է նախորդող շրջաններին, ինչը նշանակում է, որ Հայաստանն այս տարի ունեցել է իր պատմության մեջ ամենաշատ այցելուների թիվը։
Փաշինյանը նաև նկատել է, որ այս ռեկորդային ցուցանիշը տեսանելի էր դեռևս Ամանորի տոնակատարությունների ժամանակ։ Նրա խոսքով՝ այսուհետև Ամանորի տոնակատարությունները պետք է դիտարկել որպես զբոսաշրջային ապրանք, որը կարող է զգալիորեն նպաստել երկրի տնտեսությանը։
