Տավուշի մարզի դատախազությունը հարուցել է քրեական գործ Դիլիջան համայնքի ղեկավարի գործողությունների հետեւանքով պետական սեփականություն հանդիսացող հողամասի անօրինական օտարման դեպքի առթիվ։
Ինչպես հայտնի էր դարձել, Դիլիջանի ավագանու 2026 թվականի հունվարի 19-ի նիստում քվորում չլինելու պատճառով չի կարողացել քննարկել Տավուշի մարզի դատախազի տեղակալ Հ․ Աղասարյանի առաջարկությունը՝ Դիլիջանում ապօրինի օտարված հողամասի մասին դատական հայց ներկայացնելու վերաբերյալ։
Այդ հողամասը, որը գրանցված է ՆԳ նախկին նախարար Վահե Ղազարյանի եղբոր անունով, փաստացի պատկանում էր նրան, եւ այն օտարվել էր 2025 թվականի սեպտեմբերի 6-ին՝ 9 մլն 452 հազար 800 դրամով։
Հ․ Աղասարյանը համայնքի ավագանուն առաջարկել էր պետական շահերի պաշտպանության հայց ներկայացնել դատարան, ինչպես նաեւ տեղեկացնել դատախազությունը հայցի հարուցման մասին։
Դատախազությունը նշել է, որ 2026 թվականի հունվարի 21-ին հաղորդում է ներկայացվել, եւ դրա հիման վրա ՀՀ քրեական օրենսգրքի 446-րդ հոդվածի 2-րդ մասի հատկանիշներով (Պաշտոնական անփութություն) նախաձեռնվել է քրեական վարույթ, որի նախաքննությունը շարունակվում է։
Հարցումին ի պատասխան Գլխավոր դատախազությունը չի մանրամասնել, թե արդյոք դատախազությունը դիմել է դատարան՝ անօրինական կերպով օտարված պետական հողը վերադարձնելու համար, եւ չի տրամադրել տեղեկատվություն այն մասին, թե Դիլիջան համայնքի ղեկավար Դավիթ Սարգսյանին մեղադրանք առաջադրվե՞լ է։
