Հունիսի 19-ին, ժամը 18:00-ին, ավարտվեց օրենքով սահմանված ժամկետը, որի ընթացքում քաղաքական ուժերը կարող էին դիմել Սահմանադրական դատարան՝ վիճարկելու հունիսի 7-ին կայացած Ազգային ժողովի ընտրությունների արդյունքները։
Իմ տեղեկացված աղբյուրների համաձայն՝ ընտրությունների արդյունքներով իրենց դժգոհություն հայտացող յոթ քաղաքական ուժ են ներկայացրել դիմումներ։ Սրանք են՝ «Ուժեղ Հայաստան», «Հայաստան» դաշինքները, «Նոր ուժ», «Միասնության թևեր», «Բարգավաճ Հայաստան», «ԴՕԿ» և «Հանուն Հանրապետության ժողովրդավարության պաշտպաններ» կուսակցությունները։
Ներկայացված դիմումներում վիճարկվում է Հայաստանի Հանրապետության կենտրոնական ընտրական հանձնաժողովի (ԿԸՀ) կողմից ընդունված որոշումը, որով ամփոփվել են Ազգային ժողովի ընտրությունների արդյունքները։ Ընտրություններին մասնակցած այս քաղաքական ուժերը պնդում են, որ ընտրական գործընթացը տեղի է ունեցել բացահայտ ընտրախախտումների, վարչական լծակների կիրառման և ընդդիմադիր ուժերի նկատմամբ ապօրինի քրեական հետապնդումների պայմաններում։
«Սահմանադրական դատարանի մասին» սահմանադրական օրենքի համաձայն՝ դիմումի մուտքագրվելուց հետո երկօրյա ժամկետում Սահմանադրական դատարանը պետք է աշխատակարգային նիստում որոշի դիմումների ընդունելիության հարցը։ Եթե դիմումները ընդունվում են վարույթ, նշանակվում է զեկուցող դատավոր, որը նախապատրաստում է գործը դատաքննության։ Ազգային ժողովի ընտրությունների արդյունքների վերաբերյալ վեճերը քնվում են բանավոր ընթացակարգով։ Հայտնի չէ, թե այս դիմումները կամփոփվեն մեկ ընդհանուր վարույթի մեջ, թե կքննվեն առանձին։
Սահմանադրական դատարանը պարտավոր է գործը քննել և որոշում կայացնել դիմումը մուտքագրելու օրվանից ոչ ավելի, քան 15 օրվա ընթացքում։
