Այսօր ՀՀ Ազգային ժողովի ութերորդ գումարման տասնմեկերորդ նստաշրջանի նիստը չի կայացել՝ պատգամավորների անբավարար մասնակցության պատճառով։
Նիստին գրանցվել է ընդամենը երեք պատգամավոր՝ ԱԺ փոխնախագահ Հակոբ Արշակյանը, ինչպես նաև անկախ պատգամավորներ Հովիկ Աղազարյանն ու Հակոբ Ասլանյանը։ Քվորում ապահովելու համար անհրաժեշտ էր առնվազն 54 պատգամավորի ներկայություն, սակայն նիստից բացակայել է 104 պատգամավոր։
Նիստի ընթացքում Հակոբ Արշակյանը պատգամավորների բացակայությունը կապել է ընթացող նախընտրական գործընթացների հետ։ Նրա խոսքով՝ այս փուլում պատգամավորները գտնվում են իրենց ընտրական շրջաններում և հանդիպումներ են ունենում քաղաքացիների հետ՝ ներկայացնելով իրենց կատարած աշխատանքը և ձգտելով ստանալ վստահություն ապագա կառավարության ձևավորման համար։
Հատկանշական է, որ նիստին մասնակցած երեք պատգամավորներից և ոչ մեկը հաջորդ գումարման խորհրդարանում չի լինի։
