Եվրամիության դեսպանների կորպուսը Բրյուսելում հաստատել է Հայաստան նոր՝ քաղաքացիական առաքելություն ուղարկելու որոշումը։ Այս քայլը նախատեսվում է իրականացնել հաջորդ շաբաթ՝ ԵՄ արտգործնախարարների նիստում։
Առաքելության հիմնական նպատակը Հայաստանի դիմակայունությունը բարձրացնելն է հիբրիդային սպառնալիքների դեմ։ Այն կտրամադրի ռազմավարական և գործնական խորհրդատվություն՝ ուղղված նախարարություններին և անվտանգության ոլորտի գործակալություններին։
Առաքելության գործունեությունը կենտրոնանալու է մի քանի հիմնական ուղղություններում․ քաղաքականությունների մշակում, արտաքին տեղեկատվական մանիպուլյացիաների հայտնաբերում և դրանց արձագանքում, կիբերհարձակումների դեմ պաշտպանություն, ինչպես նաև ապօրինի ֆինանսական հոսքերի վրա վերահսկողություն։ Բացի այդ, առաքելությունը կգնահատի Հայաստանում անվտանգության ոլորտի կարողությունների զարգացման համար անհրաժեշտ միջոցները՝ երկիրն ավելի արդյունավետ կերպով կարողանա բացահայտել և արձագանքել հիբրիդային սպառնալիքներին՝ ԵՄ մեթոդաբանությունների և ստանդարտների համաձայն։
Առաքելության կարիքը հիմնավորվում է այն հանգամանքով, որ առաջիկա ամիսներին Հայաստանում կկայանան խորհրդարանական, տեղական ինքնակառավարման մարմինների և հավանական սահմանադրական հանրաքվե ընտրություններ։ ԵՄ-ն դրանք համարում է կարևորագույն քննություն՝ ոչ միայն ներքին կայունության, այլև տարածաշրջանային խաղաղության համար։
Փաստաթղթում նշվում է, որ առաքելության նպատակը նաև «նվազեցնել ու չեզոքացնել Ռուսաստանի ապակայունացնող գործողությունները»։
ԵՄ-ն նաև պլանավորում է շարունակել քննարկումներն Ադրբեջանի հետ՝ աջակցության նպատակը բացատրելու և խաղաղության գործընթացի վրա հնարավոր բացասական ազդեցությունից խուսափելու համար։
Այս նոր խումբը Հայաստանում տեղակայվելու է երկու տարով, ունենալու է 20-30 միջազգային աշխատակից և կգործի «Եվրամիության գործընկերության առաքելություն» անվանման ներքո։ Այն բաց կլինի նաև երրորդ երկրների մասնակցության համար, եթե և երբ Բրյուսելը համաձայնության հասնի այդ ուղղությամբ։
