Իրանի Հայաստանում նշանակված դեսպան Խալիլ Շիրղոլամին հերքում է այն տեղեկությունները, թե Ադրբեջանը կարող էր իր տարածքը տրամադրել Միացյալ Նահանգներին՝ Իրանի դեմ հարվածներ իրականացնելու նպատակով։ Այս մասին նա հայտարարել է ասուլիսի ընթացքում։
Ըստ դեսպանի՝ ռազմական և անվտանգության ոլորտի մասնագետների կողմից հաստատված չէ նմանատիպ որևէ փաստ։ Նա նշել է, որ նույնիսկ Միացյալ Նահանգների նման հզոր պետության դեպքում Իրանը պատասխան գործողություններ է իրականացրել այն երկրների տարածքներում տեղակայված ամերիկյան ռազմաբազաների նկատմամբ, որտեղից, ըստ նրա, հարձակումներ են իրականացվել Իրանի դեմ։
Դեսպանը նաև հավելացրել է, որ նման թիրախներ են եղել տարբեր երկրներում տեղակայված ամերիկյան բազաները, այդ թվում՝ Քուվեյթում, Հորդանանում, Բահրեյնում, Կատարում, Իրաքում, Սաուդյան Արաբիայում և Արաբական Միացյալ Էմիրություններում։
