ՀՀ Կենտրոնական ընտրական հանձնաժողովը (ԿԸՀ) չեղարկեց երեք ընտրատեղամասերում ընտրությունների արդյունքները, սակայն չնշանակեց վերաքվեարկություն։ Այս որոշումը, որը փոխեց ընտրությունների ընդհանուր պատկերը և դուրս թողեց մեկ ամբողջ կուսակցություն խորհրդարանից, ԿԸՀ նախագահ Վահագն Հովակիմյանը պարզաբանեց՝ հիմնվելով «իրական կամքի պաշտպանության», «համաչափության սկզբունքի» և «տակտիկական քվեարկության ռիսկի» վրա։
Ըստ նրա՝ նման որոշում կայացնելիս պետք է հաշվի առնել, որ մասնակի վերաքվեարկությունը կարող է ավելի մեծ աղավաղում առաջացնել, քան վերացվող խախտումը։ Պարզ ասած, ԿԸՀ-ն հիմնավորում է իր որոշումը նրանով, որ եթե վերաքվեարկություն նշանակենք, դրա հետևանքով խորհրդարան կանցնի այլ կուսակցություն, ինչը, ըստ նրանց, ավելի մեծ խնդիր է, քան 3 ընտրատեղամասերում տեղի ունեցած խախտումները։
Սահմանադրագետ Վարդան Պողոսյանը, անդրադառնալով ԿԸՀ նախագահի այս պարզաբանմանը, այն «անհեթեթություն» է համարում։ Նրա խոսքով՝ իրավական տեսանկյունից այս պարզաբանումը ոչ միայն անհեթեթ է, այլև անընդունելի։ «Այդտեղ մեկնաբանելու ոչինչ չկա, իր ասածն ուղղի՛ր անհեթեթություն է»,- նշեց Պողոսյանը։
Նա նաև նշեց, որ եթե Հայաստանում գործեր անաչառ Սահմանադրական դատարան, ապա 3 ընտրատեղամասի արդյունքները չեղարկելուց հետո ընտրությունների ելքը փոխելու դեպքում ընտրությունները պետք է անվավեր ճանաչվեին։ Սակայն, ըստ Պողոսյանի, մենք չունենք անաչառ դատարան, այլ ՔՊ-ի Սահմանադրական դատարան, որի որոշումները նախապես կանխատեսելի են։
