Հայաստանի համայնքների միությունը հունիսի 22-ից մինչև 26-ը կմասնակցի Մարոկկոյի Տանժեր քաղաքում անցկացվող «Միավորված քաղաքներ եւ տեղական իշխանություններ․ Եվրասիա» կազմակերպության համաշխարհային կոնգրեսին։ Միջոցառումը կնշվի «Համընդհանուր տեղական հանրային ծառայությունների նոր սերունդը» խորագրի ներքո։
Հայկական պատվիրակության կազմում են Հայաստանի համայնքների միության գլխավոր տնօրեն Արմեն Հարությունյանը և Վեդի համայնքի ղեկավար, հանրության մեջ հայտնի Գարիկ Սարգսյանը։
«Միավորված քաղաքներ եւ տեղական իշխանություններ․ Եվրասիա» կազմակերպությունը «Միավորված քաղաքներ եւ տեղական իշխանություններ» (UCLG) համաշխարհային կազմակերպության եվրասիական տարածաշրջանային մասնաճյուղն է։ UCLG-ն համաշխարհային ամենամեծ կառույցներից է, որը միավորում է ավելի քան 240 հազար քաղաք, համայնք, մարզ և մետրոպոլիա՝ աշխարհի 140 երկրից՝ ներկայացնելով մոլորակի բնակչության ավելի քան 70 տոկոսի շահերը։ Այն ճանաչված է ՄԱԿ-ի կողմից որպես տեղական և տարածաշրջանային իշխանությունների գլխավոր գործընկեր։
Տանժերում կայանալիք կոնգրեսը կհյուրընկալի ավելի քան 3 հազար մասնակից՝ տեղական և տարածաշրջանային առաջնորդների, քաղաքապետերի, նահանգապետերի, համայնքային խորհուրդների անդամների, քաղաքացիական հասարակության ներկայացուցիչների և միջազգային կազմակերպությունների գործընկերների։ Կոնգրեսի շրջանակում կկայանան Գլխավոր ասամբլեայի, Համաշխարհային խորհրդի և Գործադիր բյուրոյի նիստեր, որոնց ընթացքում կընդունվեն միջազգային համայնքային շարժման առաջիկա տարիների զարգացման հիմնական որոշումները։
Միջոցառման ընթացքում տարածաշրջանային կառույցները կներկայացնեն իրենց առաջնահերթությունները, տեղական ինքնակառավարման ոլորտի լավագույն փորձը և նորարարական լուծումները։ Մասնակիցները կքննարկեն համայնքների առջեւ ծառացած արդի մարտահրավերները, ինչպես նաև կներկայացնեն հաջողված նախաձեռնություններն ու զարգացման մոդելները։
Համայնքների միությունը, որի նախագահը ներկայումս Երեւանի քաղաքապետ Տիգրան Ավինյանն է, կներկայացնի իր գործունեությունը և կներգրավվի միջազգային գործընկերների հետ երկխոսության մեջ։
