Այսօր «Միասնության թեւեր» կուսակցության անդամները շարունակում են իրենց նախընտրական աշխատանքը Տավուշի մարզում՝ հանդիպելով բնակիչների հետ եւ լսելով նրանց առօրյա խնդիրները։ Դիլիջանի Շամախյան թաղամասի բնակիչները վարչապետի թեկնածու Արման Թաթոյանին ներկայացրեցին իրենց հիմնական անհանգստությունը՝ թաղամասի բնակելի տների գազամատակարարման ցանցից բացառված լինելը։
«Մենք վեց տուն ենք, որոնք 21-րդ դարում գազ չունեն։ Դիմել ենք հազար անգամ, նամակներ ենք գրել, բայց ոչ մեկը չի պատասխանում։ Մենք վստահություն ենք կորցրել, բայց հավատում ենք ձեզ, պարոն Թաթոյան, եւ խնդրում ենք ուշադրություն դարձնել մեր խնդրին»,- ասաց բնակչուհիներից մեկը՝ ընդգծելով իրենց անհատական դիմումների անարդյունավետությունը։
Արման Թաթոյանը հանդիսավորապես հայտարարեց, որ հունիսի 7-ի ընտրությունները պատմական նշանակություն ունեն եւ պահանջում են ճակատագրական որոշում կայացնել՝ չթողնելով, որ այդ որոշումը կայացնեն ուրիշները։ Նա նաեւ անդրադարձավ հարցին, թե կուսակցությունը ի՞նչ կապ ունի նախկին կառավարության հետ։
«Մենք քաղաքական իմաստով որեւէ կախվածություն չունենք 35 տարի իշխանության մեջ գտնված իշխանությունների հետ։ Մենք ինքնուրույն ենք, անկախ։ Մարդկանց մեծ մասը նախկինից մինչեւ ներկա ղեկավարի հետ երկրի ապագա չի կապում։ Մեր նպատակն է ձեւավորել այնպիսի իշխանություն, որի կենտրոնն ու հիմքը կլինի միայն Հայաստանի շահերը»,- ընդգծեց Թաթոյանը՝ հավելելով, որ «Միասնության թեւեր» կուսակցությունը չի ներկայացնում որեւէ արտաքին ուժ։
Կուսակցության անդամ Դավիթ Անանյանը նշեց, որ հունիսի 7-ի ընտրությունները կամ վերջակետ են, կամ ինչ-որ բանի սկիզբ։ Նրա խոսքով՝ կուսակցությունը չի կապված որեւէ կողմի հետ եւ պատրաստ է բանակցել բոլորի հետ՝ հավասարը հավասարի հետ՝ հասնելու ամենախելամիտ եւ երկրի համար ամենաօգտակար որոշման։
Արման Թաթոյանը նաեւ անդրադարձավ բանակի եւ երկրի անվտանգության հարցին՝ որպես իրենց ծրագրի ամենակարեւոր կետերից մեկը։ Նա հայտարարեց, որ եթե ժողովուրդը վստահի իրենց, ապա իրենց առաջին քայլը կլինի բանակի ֆինանսավորման ավելացումը՝ այն բերելով ՀՆԱ-ի 8 տոկոսի՝ 1 մլրդ դոլարի չափով։
«Մենք պետք է ունենանք բանակ, որն ունի զսպման ուժեղ կարողություն։ Զսպումը նշանակում է, որ եթե ցանկացած երկիր մտածի հարձակվելու մեր երկրի վրա, պետք է 10 անգամ մտածի՝ հարձակվի՞, թե՞ չէ»,- եզրափակեց Թաթոյանը՝ ընդգծելով զինված ուժերի զարգացման եւ ամրապնդման կարեւորությունը որպես երկրի անվտանգության հիմնաքար։
