Այսօր՝ մայիսի 8-ին, Հայաստանում պաշտոնապես մեկնարկում է Ազգային ժողովի հերթական ընտրությունների նախընտրական քարոզարշավը։ Այս ամսաթիվը հիշարժան է նաև պատմական նշանավոր իրադարձությամբ, որը հայ ժողովրդի համար ունի անփոխարինելի նշանակություն։ 1992 թ. մայիսի 8-ին հայկական զինուժն ու կամավորական ջոկատները ազատագրեցին հայկական Շուշին ադրբեջանական գերությունից՝ նշանավորելով Արցախյան ազատամարտի և Հայոց նորագույն պատմության ամենափառավոր էջերից մեկը։
Ճակատագրի հեգնանքով կամ էլ զարմանալի զուգադիպությամբ՝ այդ նույն ամսաթվին՝ 2018 թ. մայիսի 8-ին, Նիկոլ Փաշինյանն Ազգային ժողովում ընտրվեց Հայաստանի վարչապետ։ Այս իրադարձությունը նշանավորեց Հայաստանում իշխանության փոփոխություն, որը հետագայում բերեց բազմաթիվ ծանրագույն հետևանքներ, այդ թվում՝ նույն հայկական վերստին օկուպացումով ու գերեվարումով։
Այս թեմայի շուրջ իր տեսակետները հայտնեց ՀՀԿ խորհրդի անդամ, քաղաքագետ Արմեն Հովասափյանը։ Նա ընդգծեց, որ երբևէ Հայաստանում այսպիսի թունավոր միջավայր չի եղել, որտեղ հանրային խոսքում այսքան կեղտոտ բառամթերք ու ատելության խոսք է գրանցվել։
«Կասկած չունեմ, որ Փաշինյանի թիմն ավելացնելու է գռեհկաբանությունը, սպառնալիքները, մատթափտվոցիները, «ասֆալտին փռելը», «գետնով տալը», «պատերին ծեփելը»՝ այս բառերն առաջիկա մեկ ամսվա ընթացքում շատ ենք լսելու։ Վերջին 20 տարվա մեջ նման կեղտոտ բառամթերք երբևէ լսած չկամ՝ ինչ լսում եմ վերջին հատկապես մեկ տարվա մեջ։ Այն բառապաշարը, որ սրանք են շաղ տալիս, այսքան ատելության խոսք, այսպիսի տոքսիկ միջավայր երբևիցե գոյություն չի ունեցել Հայաստանում»,- նշեց Հովասափյանը։
Նա նաև նկատեց, որ Նիկոլ Փաշինյանը իր քարոզարշավը սկսել է Կառավարության նիստում՝ 77 րոպեանոց ժամանակահատվածից 52 րոպեին խոսելով ընտրություններից և օգտագործելով իր սիրած «լեգենդար ասֆալտի» մետաֆորը։
Քաղաքագետը նկատեց, որ իշխանությունները հանրությանը ներկայացնում են իրենց ծախսերը՝ որպես լավություն, ստեղծելով պատրանք, թե մինչև 2018 թիվը Հայաստանում ո՛չ ճանապարհ է եղել, ո՛չ լույս, ո՛չ ջուր, ո՛չ թե՛ ասֆալտ։ «Ամբողջ ցավը դրա մեջ է, որ իրենց պարտականությունը ծախում են հանրությանը՝ որպես լավություն»,- եզրափակեց նա։
Արմեն Հովասափյանը հորդորում է ընդդիմությանը՝ իր ասելիքը հասցնել ժողովրդին և շատ խոսել մարդկանց հետ՝ հատկապես մարզերում։ Նրա կարծիքով՝ ճիշտ աշխատանքը և քարոզարշավը կարող են փոխել ընտրությունների արդյունքը։
Նա նաև մեկնաբանեց Շուշիի ազատագրման օրվա պատմական նշանակությունը՝ նշելով, որ այսօր մեր փառապանծ հաղթանակի օրն է, որը Նիկոլ Փաշինյանի իշխանության տակ վերածվեց անհասկանալի իրավիճակի։ «Հոգու խորքում բոլորս էլ հասկանում ենք, որ քոչարին Շուշիում պետք է պարվի… Էլի հաղթական քոչարի պետք է պարենք մի օր»,- հավելեց նա։
Այսպիսով, մայիսի 8-ի օրը դարձել է ոչ միայն հայ ժողովրդի պատմության հաղթանակի, այլև իշխանության փոփոխության և դրա հետևանքների խորհրդանիշը։
