Վայք քաղաքում ոստիկանության աշխատակիցները ապօրինի կերպով առգրավել են «Ազգային-ժողովրդավարական Բևեռի» քարոզչական փիքափ մակնիշի մեքենան, որն իրականացնում էր բնակչության իրազեկման աշխատանքներ։
Որպես պատճառաբանություն ոստիկանները ներկայացրել են այն պնդումը, թե մեքենան ենթարկվել է տեխնիկական վերասարքավորման, ինչի համար համապատասխան լիցենզիա առկա չէ։
Սա, ըստ իմ կարծիքի, բացահայտ քաղաքական դիտավորություն է։ Նույն այս մեքենան վերջին 3 օրերին անընդմեջ, նույն կահավորմամբ շրջում էր Երևանում, և իրավապահ մարմինների կողմից որևէ խնդիր կամ հարց չի բարձրացվել։
Մեքենան կանգնեցվել և առգրավվել է հենց այսօր՝ Սյունիքի մարզ ուղևորվելու կես ճանապարհին։ Սա ուղղակիորեն փաստում է, որ գործընթացը կրում է նպատակային բնույթ՝ տապալելու Բևեռի նախընտրական քարոզարշավը մարզերում։
«Ազգային-ժողովրդավարական Բևեռը» սա որակում է որպես քաղաքական պատվեր և քարոզչության իրականացմանը խոչընդոտելու հատուկ դիտավորություն։
Հրավիրում ենք հանրության, իրավապաշտպանների և ընտրական գործընթացին հետևող միջազգային ու տեղական դիտորդների ուշադրությունը տեղի ունեցող ապօրինության վրա։ Իշխանությունները, կիրառելով վարչական ռեսուրսը, փորձում են լռեցնել այլախոհությունը և խախտել հավասար մրցակցային պայմանները։
Պահանջում ենք անհապաղ դադարեցնել ապօրինի սահմանափակումները և վերադարձնել մեքենան։
