Ուժեղ Հայաստան դաշինքի ներկայացուցիչները հայտնում են, որ նրանց աջակիցներին և համակիրներին համատարած արգելվում է տարածքներ տրամադրել՝ նախընտրական շտաբների համար։ Բացի այդ, կան տեղեկություններ, որ տարբեր բիզնես նպատակներով վարձակալված տարածքներից հանում են կուսակցության համակիրներին։
Թեքվոնդոյի մարզիչ Ա․ Ա․-ն, որը Սամվել Կարապետյանի համակիրներից է, նոր տարածք է փնտրում իր թիմի համար։ Նա պատմում է, որ Շենգավիթ վարչական շրջանում մինչև վերջին օրերը դահլիճ էր վարձակալել, որտեղ անցկացնում էր իր թիմի մարզումները։ Բայց օրերս տվյալ հաստատությանը ժամանել են Երևանի քաղաքապետարանից, մտել նաև նրա աշխատասենյակ, որտեղ պատերին Գարեգին Նժդեհի, մեր ազգային հերոսների նկարներն էին կախված, իսկ սեղանին՝ Սամվել Կարապետյանի նախընտրական բուկլետներն էին դրված։ Հաջորդ օրը տվյալ հաստատության տնօրենը մոտեցել է Ա․ Ա․-ին և խնդրել է ազատել տարածքը, քանի որ այդտեղ քաղաքապետարանը պատրաստվում է բարեգործական ճաշարան բացել։ Մարզիչը համոզված է, որ այս որոշումը քաղաքական ենթատեքստ ունի։
Այսպիսի դեպքերը, ինչպես նշվում է, բազմաթիվ են՝ թե՛ Երևանում, թե՛ մարզերում։ Մի պաշտոնյայի որդին, որը վարձակալությամբ տարածք է հանձնում, ստիպվել է ազատել այն «Ուժեղ Հայաստանի» անդամներին՝ նախընտրական շտաբ ծառայեցնելու նպատակով։ Պաշտոնյայի հոր ղեկավարը պաշտոնյային դրել է այլընտրանքի առաջ՝ կա՛մ որդին դուրս կհանի ընդդիմադիր վարձակալին, կա՛մ էլ ինքը կազատվի աշխատանքից։
«Ուժեղ Հայաստան» կուսակցության խոսնակը հայտնում է, որ դաշինքը հակված է այդ դժվարությունները շրջանցել և դրանց մասին չխոսել՝ վախի մթնոլորտ չտարածելու համար։
«Ուժեղ Հայաստան» կուսակցության ներկայացուցիչ Դավիթ Ղազինյանը հաստատում է, որ ունեն ահազանգեր, որ նախընտրական շտաբների համար տարածքներ վարձակալելու հարցում կան բարդություններ։ Նա նշում է, որ կան երկու տեսակի խնդիր․ մեկը՝ երբ ճնշում են, որպեսզի չտրամադրեն տարածք, մյուսը՝ երբ մարդիկ արդեն տվել են տարածքները, բայց հետո ստիպված են եղել դրանք հետ վերցնել։
Ղազինյանը նաև հայտնում է, որ այս օրերին անընդհատ ավելանում են իրենց ակտիվիստների և համակիրների ձերբակալությունների և ազատազրկումների դեպքերը։ Նա չի բացառում, որ ձայնագրություններին ներդրված մարդիկ լինեն ձայնագրողները։
