ՀՀ կառավարությունը մտադրություն ունի իրականացնել քառափուլ ծրագիր, որի նպատակն է ֆինանսական աջակցության միջոցով լուծել բնակարանային խնդիրը Պաշտպանության նախարարության համակարգում ծառայած կամ մեր շահառու հանդիսացող քաղաքացիների համար, որոնց բնակարանային խնդիրները սկիզբ են առել դեռևս 2000-ականներից։ Այս մասին ապրիլի 30-ի նիստին հայտարարեց Պաշտպանության նախարար Սուրեն Պապիկյանը՝ ներկայացնելով համապատասխան որոշման նախագիծը։
Ծրագրի հիմնական նպատակն է տասնամյակներ շարունակ բնակարան ստանալու հերթում գտնվող քաղաքացիներին ապահովել բնակարանային խնդրի արդյունավետ լուծմամբ։ Ըստ նախարարի՝ ծրագիրը կիրականացվի «հիփոթեքային վարկավորման գործիքի» միջոցով։ Ֆինանսավորման 90 տոկոսը կտրամադրվի բանկերի միջոցով՝ Կառավարության կողմից, իսկ մնացած 10 տոկոսը՝ Պաշտպանության նախարարության տարեկան ֆինանսավորման միջոցով։
Ծրագրի իրականացման ժամանակացույցը հետևյալն է․
2027 թվական՝ 735 շահառուի բնակարան հատկացում։
2028 թվական՝ 812 շահառուի բնակարան հատկացում։
2029 թվական՝ 719 շահառուի բնակարան հատկացում։
2030 թվական՝ 4-րդ փուլում՝ 584 շահառուի բնակարան հատկացում։
Ծրագրի շահառուներ են Պաշտպանության նախարարության համակարգի բնակարանային պայմանների բարելավման հաշվառմանն ընդգրկված պայմանագրային զինծառայողները և քաղաքացիական ծառայողները, օրենքով սահմանված հիմքերով զինծառայությունից արձակված նախկին զինծառայողները, զինծառայության հետ պատճառական կապով հաշմանդամություն ունեցող նախկին զինծառայողները և զոհված, մահացած զինծառայողների ընտանիքի անդամները։
Վարչապետ Նիկոլ Փաշինյանը պարզաբանեց, որ խոսքը վերաբերում է այն շահառուներին, որոնք 90-ականներից են ընդգրկված բնակարան ստանալու հերթացուցակում, և որոնց նկատմամբ պետությունը ժամանակին պարտավորություն է ստանձնել։
Սուրեն Պապիկյանը նաև նշեց, որ ծրագրի շահառուները կունենան 10 տարվա ընթացքում բնակարանը վաճառքի ենթակա դարձնելու արգելք, իսկ բնակարանի գինը կհաշվարկվի շուկայական միջին արժեքով։ Շահառուները կարող են ձեռք բերել բնակարան ոչ միայն առաջնային և երկրորդային շուկաներից, այլև այն, որը կկառուցվի հետո։
