ՀՀ վարչապետ Նիկոլ Փաշինյանը մայիսի 18-ին հրապարակային հանդես էր գալիս, երբ հայտարարեց, որ ընդդիմադիր քաղաքական գործիչներին կենթարկեցնելու է «հաշվեհարդար»։ Այս հայտարարությունը, որը հնչեցվել է գալիք խորհրդարանական ընտրություններից ընդամենը երեք շաբաթ առաջ, վերաբերում էր չորս քաղաքական գործիչների, որոնցից երեքն առաջնորդում են ընտրական մրցակցության մեջ մասնակցող քաղաքական կուսակցություններ։
Փաշինյանի սպառնալիքների հիմնավորումը դարձավ անհայտ ծագման տեսանյութ, որտեղ դիմակավորված և զինված չորս անձ սպառնում են վարչապետին։ Նա առանց որևէ փաստի կապելով տեսանյութը ընդդիմադիրներին, պնդեց, որ դիմակավորվածների թիկունքում կանգնած են իր քաղաքական մրցակիցները։
Այսպիսի սպառնալիքներն ինքնին հարցականի տակ են դնում ընտրական գործընթացի արդարացիությունը և քաղաքական ուժերի հավասար մրցակցային պայմաններից օգտվելու հնարավորությունը։ Փաստն այն է, որ նախկինում նման հայտարարություններին հաջորդել են ուժային կառույցների գործողություններ։ Դիմակավորված անձանց անհայտ ծագման տեսանյութն օգտագործվում է որպես պատրվակ՝ քաղաքական մրցակիցներին ճնշելու համար։
Հաշվի առնելով նախկին փորձը, ինչպես նաև վարչապետի՝ ուժային կառույցների և դատական համակարգի նկատմամբ ունեցած լծակներն ու ազդեցությունը, մայիսի 18-ին հնչեցված հաշվեհարդարի սպառնալիքները պետք է ընկալվեն լուրջ և մեկնաբանվեն որպես վերահաս քաղաքական հետապնդումների սպառնալիք։
