Քարոզարշավը նախընտրական գործընթացի անբաժանելի մասն է, որի հիմնական նպատակը թեկնածուների համար ընտրողների հետ ինտենսիվ շփում ապահովելն է՝ ստեղծելով հավասար պայմաններ բոլոր մասնակիցների համար։ Այն թեկնածուներին հնարավորություն է տալիս ներկայացնել իրենց ծրագրերը, անձնական որակները և համոյզել ընտրողին՝ իրեն ձայն տալու համար։
Սակայն, ինչպես հաճախ նկատվում է, այս գաղափարը մեզանում վարկաբեկվել է և աղավաղվել։ Որոշ քաղաքական ուժեր, այդ թվում՝ Նիկոլ Փաշինյանը, այս մեկ ամսվա ընթացքում իրենց ծրագրերի և անելիքների մասին խոսելու փոխարեն, հիմնական ուշադրությունը կենտրոնացնում են մրցակիցների թերությունները բարձրաձայնելու, նրանց վիրավորելու և վարկաբեկելու վրա։ Նրանց հաշվարկն այն է, որ մրցակիցների իջած ռեյտինգի հաշվին իրենց ռեյտինգը բարձրացնել։
Այս հնարքը հատկապես հստակորեն երևում է Նիկոլ Փաշինյանի քարոզարշավի ընթացքում։ 8 տարվա ընթացքում նա չի ունեցել ոչ մի արգելք՝ իր արժանիքները հանրությանը ներկայացնելու համար, բայց այս ընթացքում հիմնականում օգտագործել է իր լսարանը՝ բոլորին մեղադրելու և վարկաբեկելու համար՝ հույս ունենալով, որ այդ ֆոնին ինքն ավելի լավ կերևա։ Նրա բոլոր գրառումներն ու ելույթները հազարավոր էջերով տարածվել են՝ հաճախ ուղեկցվելով ատելության խոսքով և թշնամանքի տարածմամբ։
Նա անարգել է արել ամենաանհեթեթ և անթույլատրելի հայտարարություններ՝ վիրավորելով և հայհոյելով տարբեր անձանց և ինստիտուտներ։ Նա փորձել է պառակտել հանրությանը և նսեմացնել հայի արժեքները։ Իրավիճակը նույնն է մնում նաև այս նախընտրական շրջանում։
Այսպիսով, քարոզարշավը, որը պետք է լիներ քաղաքական մտքերի և ծրագրերի փոխանակման հարթակ, վերածվել է մրցակիցների վրա ցեխ շպրտելու և ինքն իրեն ավելի լավ ներկայացնելու միջոցի։
