Հայաստանում ընդդիմադիր մամուլի միջոցով 16 տարի առաջ հայտնի դարձած Ռոբերտ Քոչարյանի 4 միլիարդ դոլարի ունեցվածքի մասին լուրը, որը վերատպվել էր երկրորդական կարգի ռուսական պարբերականից, այն օրերին ես, որպես ընդդիմադիր անձնավորություն, հավատում էի։ 2023 թվականի վերջին, սակայն, դատախազությունը դատարան ներկայացրեց ապօրինի ծագում ունեցող գույքի բռնագանձման վերաբերյալ հայցադիմումներ՝ պահանջելով բռնագանձել 25 միավոր անշարժ գույք, 5 տրանսպորտային միջոց, մասնակցություն 16 իրավաբանական անձերում, ավելի քան 4 միլիոն դոլարի ավանդներ և արժեթղթեր, ինչպես նաև շուրջ 10 միլիարդ դրամին համարժեք պարտքերի պահանջի իրավունք։
Այս պահանջի մասին մանրամասն տեղեկատվությունը ներկայացնելու պատճառն այն է, որ եթե նույնիսկ ընդունենք, որ այդ ամենը ճշմարիտ էր, 2016 թվականին այն ոչ միայն 4 միլիարդ դոլար չէր կազմել, այլև այդ գումարի մեկ տասներորդ մասն էլ։ Օրինակ, բժշկական կենտրոններից մեկի հետ կապված հարցումին ի պատասխան ՀՀ երկրորդ նախագահը հայտարարել էր, որ իր ընտանիքը դրա հետ կապ չունի, և այդ հայտարարությունը չի հերքվել համապատասխան հիմնավորմամբ։ Ահա այսպիսի կերպ էր գործում այն ընդդիմությունը, որի ներկայացուցիչներից մեկն այսօր զբաղեցնում է երկրի վարչապետի պաշտոնը։ Ու, բնականաբար, պետք է շարունակեր գործել այնպես, ինչպես սովոր էր։
Այս համատեքստում հիշվում է նաև Վեհափառի եղբոր՝ Եզրաս արքեպիսկոպոս Ներսիսյանի՝ ԽՍՀՄ հատուկ ծառայության՝ ԿաԳեԲե-ի գործակալ լինելու վերաբերյալ կեղծ փաստաթուղթը։
Այս տեղեկատվությամբ զինված, անցնենք Կարապետյանների վերաբերյալ լուրերի պատմությանը։ Սամվել Կարապետյանը մեղադրվում է, որ նախորդ դարավերջին եղել է ռուսական հատուկ ծառայությունների աշխատակից։ Ինչն, իհարկե, հերքվեց նրա կողմից։ Նրա եղբոր որդին էլ մեղադրվեց, որ ՀՀ-ի հետ մեկտեղ ունի նաև ՌԴ քաղաքացիություն, ինչը թաքցվել է։ Ու այդ առումով քրեական գործ հարուցվեց։ Ի պատասխան՝ Նարեկ Կարապետյանը հայտարարեց, որ բոլոր նրանց հանդեպ, ովքեր շրջանառել են այդ տեղեկատվությունը, քաղհայցով դիմելու են դատարան։ Նա նաև հայտարարեց, որ բռնագանձված գումարները կուղղվեն Սևանի հոգեբուժարանին՝ այնտեղ անվճար տեղավորելու համար այն մարդկանց, ովքեր ունեն հոգեկան խնդիրներ։
Ինչպես երևում է, այս կեղծիքները նախընտրական քարոզարշավում հիանալի հաղթաթուղթ են լինելու ընդդեմ գործող իշխանության, չնայած սկզբում օգտագործվեցին նրա կողմից։
Ինչ մնում է երկքաղաքացիությունը թաքցնելուն, ապա լո՞ւրջ՝ կհարցներ այլմոլորակայինը՝ եթե երկու շաբաթ առաջ հայտնված լիներ Հայաստանում։ Ծանոթ լինելով օրենքներին՝ հետևած լիներ քարոզարշավին և կմտածեր, որ Նարեկը, կարծես թե, խելացի երիտասարդ է, ու դժվար թե այնքան միամիտ լիներ, որ չպատկերացներ, որ թվային աշխարհում հաքերներից ոչինչ թաքցնել հնարավոր չէ։ Էլ չասած հայաստանյան խիստ պրոֆեսիոնալ իրավապահների ու նիկոլական լրատվամիջոցների մասին։ Որ ոստիկանությունը չէր կարողացել այդ հանգամանքը բացահայտել ժամանակին՝ երբ երկքաղաքացիության բացակայության վերաբերյալ փաստաթուղթ էր տրամադրում Նարեկ Կարապետյանին։
Հասանք տեղեկատվության աղբյուրի հարցին։ Քննչական կոմիտեում նախաձեռնվել է քրեական վարույթ ոստիկանության՝ առերևույթ հանցանքի վերաբերյալ հաղորդման հիման վրա։ Սակայն, ինչպես հաճախ է պատահում, հաղորդման առաջնային աղբյուրը բացակայում է։ Տեղեկատվությունը ներկայացրել էր նիկոլական «Medianews» լրատվականը, ինչն ավելի վաղ հայտնվել էր Սիմոնյան Ալենի էջում։ Իսկ լրատվականն էլ վերատպում էր արել ԵՄ անդամ Լատվիայում գործող հակապուտինյան «The Insider» ռուսական կայքը։ Այս շարքը թվարկելը, կարծեմ, բավարար է, որպեսզի մարդ սկսի կասկածել տեղեկատվության ճշմարտացի լինելու մեջ։
ՀՀ ոստիկանության պետի տեղեկատվական և հասարակայնության հետ կապերի բաժնի պետ Աննա Գրիգորյանը հրաժարվել է մեկնաբանել հարցումը՝ նշելով, որ գործը քննչական փաստաթղթերի գաղտնիության ներքո է։
