Հայաստանի հանրային գործիչ Ռուբեն Վարդանյանի կինը՝ Վերոնիկա Զոնաբենդը, հայտարարել է նոր մարդասիրական նախաձեռնության մասին, որի շրջանակում մտադիր է կազմակերպել կանանց միջազգային պատվիրակության այց Բաքու՝ աջակցելու ադրբեջանական կալանքի տակ գտնվող հայ բանտարկյալների։
«2023 թվականի սեպտեմբերից իմ ամուսինը՝ Ռուբեն Վարդանյանը, անօրինի պահվում է Ադրբեջանում»,- ասում է Վերոնիկա Զոնաբենդը։ «Նա արդեն ավելի քան երեք տարի զրկված է իր ընտանիքին, հարազատներին տեսնելու հնարավորությունից։ Այս ընթացքում ծնվել են նրա թոռնիկները, որոնց նա երբեք չի պահել իր գրկում»։
Նա նշում է, որ խոսքը միայն Ռուբենի մասին չէ, այլև 18 այլ հայերի մասին, որոնցից ոմանք վեց տարի չեն տեսել իրենց հարազատներին։ Նրանց ընտանիքների համար նրանք «օրակարգային հարց» կամ «քաղաքական հարց» չեն, այլ ամուսիններ, հայրեր, պապիկներ, որդիներ և եղբայրներ, որոնց միակ «մեղքն» այն է, որ ցանկացել են ապրել իրենց նախնիների հողում, խոսել իրենց մայրենի լեզվով և պահպանել իրենց մշակույթը։
Վերոնիկա Զոնաբենդը նշում է, որ ադրբեջանական կալանքի տակ գտնվող հայ բանտարկյալների ընտանիքները փաստացի զրկված են իրենց հարազատների հետ կանոնավոր, մարդասիրական անկախ կապից՝ Կարմիր խաչի միջազգային կոմիտեի (ԿԽՄԿ) գրասենյակի փակվելուց հետո։ Նա հավելում է, որ միջազգային այն մեխանիզմները, որոնք պետք է պաշտպանեն մարդուն նման իրավիճակներում, գործնականում չեն աշխատում։
Նրա խոսքով՝ նախաձեռնության նպատակն է աջակցության նամակներ և լուսանկարներ փոխանցել Բաքվում պահվող հայ բանտարկյալներին՝ նրանց հիշեցնելով, որ նրանք մոռացված չեն։ Նամակները հնարավոր է ուղարկել հետևյալ հասցեով՝ letters@freearmenianprisoners.com։
Վերոնիկա Զոնաբենդը հավատում է, որ կարող ենք մարդ մնալ միայն այն դեպքում, եթե թույլ չտանք, որ անտարբերությունը դառնա նորմ։ Նա հավատում է, որ նույնիսկ քաղաքականության ազդեցության տակ, որտեղ քայլերն ուղղված են վստահության կոտրմանը, դեռևս հնարավոր է կատարել մարդկային քայլ։
