Այսօր իմ բնակարանում իրականացված խուզարկությունը, իմ կարծիքով, ուղղակիորեն կապված է ավագանու նիստի հետ, որին ես պատրաստվում էի մասնակցել։
Իրավապահները ինձ կանգնեցրին մարզպետարանի հարակից հատվածում, երբ ես արդեն պատրաստվում էի ավագանու նիստին։ Ինձ տեղեկացրին, որ պետք է ուղեկցեմ նրանց տուն, որտեղ էլ հետագայում իրականացվեց խուզարկությունը։ Ճանապարհին ես արդեն հասկանում էի, որ իմ նկատմամբ նախապատրաստված որոշակի գործողություն կա։
Նիստի համար նախապես պատրաստված իմ ելույթում ես մտադիր էի խոսել իշխանությունների կողմից իրականացվող քաղաքական ճնշումների մասին, այդ թվում՝ վերջին շրջանում ինքնի և մեր խմբակցության անդամների նկատմամբ տեղի ունեցած իրադարձությունների վերաբերյալ։
Հիշեցնեմ, որ իշխանությունները հրապարակել են 6 տարբեր ձայնագրություն։ Դրանցից միայն մեկի վերջում մեր խմբակցության անդամ Հասմիկ Սահրադյանը նշում է իմ անունը՝ ասելով, որ «պատասխանատուների հետ պիտի աշխատանքը հարմարեցնենք»։ Այս արտահայտությունը դարձել է նրանց գործողությունների հիմքը։
Խուզարկության ընթացքում առգրավեցին իմ ընտանիքի անդամների՝ ինձ, կնոջս և երեխաներիս հեռախոսները։ Իրենց ասացի, որ դա հայ տղամարդուն վայել չէ։ Այնուամենայնիվ, այս ամենի հետևանքով ես զրկվեցի ավագանու նիստին մասնակցելու հնարավորությունից։
Իմ կարծիքով, տեղի ունեցածը ակնհայտորեն կապված է ավագանու նիստի հետ։ Իրավապահների գործողությունները զարմանալի էին։ Ես չգիտեմ, թե ինչից էին այդքան անհանգստացած կամ ինչ էին փնտրում։ Նրանք մտնում են տուն, իրականացնում խուզարկություն, առգրավում տեխնիկան, բայց որևէ արդյունք չեն արձանագրում։
