Այսօր տեղի ունեցավ Քաջարանի թունելի շինարարության մեկնարկի պաշտոնական արարողությունը, որին մասնակցեցին Իրանի Իսլամական Հանրապետության նախագահի տեղակալ Սեյեդ Համիդ Փուրմոհամադին, Հայաստանի Հանրապետության փոխվարչապետ Մհեր Գրիգորյանը, ՀՀ տրանսպորտի, կապի եւ տեղեկատվական տեխնոլոգիաների նախարար Դավիթ Խուդաթյանը, դիվանագիտական կորպուսի ներկայացուցիչներ, Ազգային ժողովի պատգամավորներ եւ այլ հյուրեր։
Արարողությանը նախորդել է հյուրերի կողմից Քաջարան-Ագարակ 32 կմ ճանապարհահատվածի երկու թունելներում կատարված շրջայցը, որի ընթացքում նրանք ծանոթացան կատարված հսկայածավալ աշխատանքներին։ Շրջայցից հետո տեղի ունեցավ Քաջարանի թունելի կառուցման պայմանագրի ստորագրման հանդիսավոր արարողությունը։
Քաջարանի թունելի կառուցումը Հյուսիս-հարավ ավտոմայրուղիի կառուցման ամենահիմնարար եւ առաջնահերթ փուլերից է, որը հնարավորություն կտա ամբողջությամբ գործարկել Հյուսիս-հարավի հարավային հատվածի մեծ մասը։
Այս նորարարական կառույցի շնորհիվ ներկայում գործող երթուղին կկրճատվի մոտ 14 կմ-ով։ Թունելի շնորհիվ տրանսպորտային միջոցների միջին արագությունը կհասնի 80 կմ/ժ-ի՝ 50 կմ/ժ-ից, ինչը կնշանակում է, որ երթեւեկության ժամանակը կկրճատվի մոտ 40 րոպեով։
Քաջարանի թունելի կառուցումը կլուծի նաեւ մեկ այլ կարևոր խնդիր՝ կշրջանցել ծովի մակերեւույթից 2535 մ բարձրության վրա գտնվող Մեղրու լեռնանցքը։ Սա զգալիորեն կբարձրացնի ճանապարհային անվտանգության մակարդակը եւ կապահովի անցանելիությունը նաեւ ամենացուրտ ձմեռային ամիսներին՝ խուսափելով լեռնանցքի փակման հետ կապված դժվարություններից։
Քաջարանի թունելի կառուցման ծրագիրն իրականացվելու է Կայունացման եւ զարգացման եվրասիական հիմնադրամի կողմից հատկացված 200 միլիոն ԱՄՆ դոլար վարկային միջոցներով եւ շուրջ 195 միլիոն ԱՄՆ դոլար Հայաստանի Հանրապետության համաֆինանսավորմամբ։
Շինարարական աշխատանքները նախատեսվում են սկսել 2026 թվականին եւ ավարտել 6 տարվա ընթացքում։ Ծրագրի շրջանակում կկառուցվի ոչ միայն 7,2 կմ երկարությամբ Քաջարանի թունելը, այլեւ շուրջ 4 կմ մոտեցնող ճանապարհներ։
Թունելի ներսում կառուցվելիք ճանապարհը կունենա երկու երթեւեկելի գոտի եւ մայթեր՝ 10.6 մետր ընդհանուր լայնությամբ։ Տրանսպորտային միջոցների արտակարգ կանգառներն ապահովելու նպատակով յուրաքանչյուր 250 մետրը մեկ նախատեսվում է թունելի երթեւեկելի գոտու լրացուցիչ 3 մետր խորությամբ լայնացում։ Արտակարգ իրավիճակների դեպքում տարհանման նպատակով թունելի տակ կկառուցվի նաեւ ելք։
Քաջարանի թունելի եւ մոտեցնող ճանապարհների կառուցման համար պայմանագիր է կնքվելու իրանական «Աբատ Ռահան Պարս Ինթերնեյշնլ Գրուպ» եւ «Թունել Սադ Արիանա» համատեղ ձեռնարկության հետ։
