Բելգիայի Դաշնային խորհրդարանի պատգամավոր Էլեն Սամինը բանավոր հարցադրում է ուղղել Բելգիայի արտաքին գործերի նախարար Մաքսիմ Պրևոյին՝ կապված «ՀայաՔվե» ազգային քաղաքացիական միավորման համակարգող Ավետիք Չալաբյանի կալանավորման և Հայաստանում ընդդիմության իրավունքների և դատական իշխանության անկախության վիճակի հետ։
Պատգամավորը նշել է, որ Ավետիք Չալաբյանի նախորդ քրեական հետապնդումն արդեն իսկ արժանացել է միջազգային հիշատակության։ Նրա գործին անդրադարձել են միջազգային կազմակերպություններ, ինչպիսիք են ԱՄՆ դեսպանությունը Հայաստանում, Եվրոպայի խորհրդի խորհրդարանական վեհաժողովը և Freedom House-ը, որոնք բարձրաձայնել են կամայական կալանքի, քաղաքական ազատությունների սահմանափակման և արդար դատաքննության երաշխիքների վերաբերյալ լուրջ մտահոգությունները։
Էլեն Սամինը Բելգիայի կառավարությանն ուղղել է մի շարք հարցադրումներ՝ ուղղված Բելգիայի և եվրոպական կառույցների դիրքորոշմանը։ Նա հարցրել է, արդյո՞ք Բելգիան և Եվրոպական միությունը հետևում են Ավետիք Չալաբյանի գործին։ Պատգամավորը նաև հետաքրքրվել է, արդյո՞ք Հայաստանի հետ պաշտոնական շփումներում բարձրացվում են քաղաքական ազատությունների, ընդդիմության իրավունքների և դատական իշխանության անկախության հարցերը։
Ավելի լայն համատեքստում Էլեն Սամինը հարցրել է, թե ինչպես է Եվրոպական միությունը համատեղում Հայաստանի հետ համագործակցության խորացումը՝ միաժամանակ հաշվի առնելով ընդդիմության նկատմամբ իրականացվող ճնշումների վերաբերյալ միջազգային մտահոգությունները։ Վերջում նա հարցրել է, թե արդյո՞ք Բելգիան կշարունակի պաշտպանել Հայաստանում հիմնարար ազատությունները, քաղաքական բազմակարծությունն ու անկախ դատական համակարգը՝ ԵՄ շրջանակում իր պարտավորությունները կատարելով։
