Երեկ իրավապահ մարմինները խուզարկություն են իրականացրել «Մարտական խաչ» 1-ին աստիճանի շքանշանակիր, գնդապետ Էդիկ Մալոյանի բնակության վայրում։ Խուզարկությունից հետո նրան ձերբակալեցին, իսկ ուշ երեկոյան նրա խափանման միջոցի հարցը քննարկել է անմռունչ կալանքներ տվող դատավոր Մասիս Մելքոնյանը։
Քրեական գործի նյութերում նշված է, որ նրա նկատմամբ քրեական վարույթ է նախաձեռնվել պետական գաղտնիք պարունակող տեղեկություններ հրապարակելու դեպքի առթիվ։ Ձերբակալվածների թվում է նաև մեկ այլ անձ։
Հետաքննության մեջ ներգրավված անձանց կողմից տրամադրված տեղեկությունների համաձայն՝ զինվորականի նկատմամբ հետաքննություն է սկսվել այն բանից հետո, երբ նրա կինը՝ «Ուժեղ Հայաստան» կուսակցության առաջնորդ Սամվել Կարապետյանի հետ ունի ազգակցական կապ։
Ըստ քրեական գործի նյութերի՝ գնդապետ Էդիկ Մալոյանը, որը ՀՀ Պաշտպանության նախարարության N զորամասի հրամանատար է՝ գնդապետի կոչումով, չունենալով պետական գաղտնիք պարունակող համապատասխան տեղեկությանը ծանոթանալու իրավունք, ՀՀ ՊՆ N զորամասի գաղտնիության ռեժիմի գծով սպա, պետական գաղտնիք պարունակող տեղեկությանը ծանոթանալու իրավունք ունեցող Ռ.Ջ.-ին դրդել է հրապարակել պետական գաղտնիք պարունակող տեղեկություն, այնուհետև՝ հրապարակել է իր կողմից ապօրինի եղանակով ձեռք բերված՝ հիշյալ պետական գաղտնիք պարունակող տեղեկությունը։
Էդիկ Մալոյանը վերջերս ծառայել է որպես Վարդենիսի Ախպրաձորի զորամասի հրամանատար։ Նա վաստակավոր և խիզախ զինվորական է, որը երկար տարիներ ծառայություն է իրականացրել Արցախի Մարտակերտ քաղաքում։ 2020 թվականից հետո, երբ Արցախի ԱԱԾ-ում հատուկ նշանակության վարչություն է ստեղծվել, նա նշանակվել է որպես տեղակալ։ Նա մասնակցել է 2020 թվականի ապրիլյան և 44-օրյա պատերազմներին, ինչպես նաև 2023 թվականին Արցախի դեմ ադրբեջանական ագրեսիան հետ մղելուն։ Նրան դասում են «բաեվոյ աֆիցեռների» շարքին։ Հայաստան բռնի տեղահանվելուց հետո նրան վերցրել են ԶՈՒ-ի ծառայության՝ ամենաթեժ կետերից մեկում։
