Հայաստանի վարչապետ Նիկոլ Փաշինյանը մեկնաբանել է Ռուսաստանի նախագահ Վլադիմիր Պուտինի հայտարարությունը, որում նա առաջարկել էր Հայաստանին հնարավորինս շուտ կողմնորոշվել Եվրասիական տնտեսական միության (ԵԱՏՄ) և Եվրամիության (ԵՄ) միջև ընտրություն կատարելու հարցում։
Վլադիմիր Պուտինը նշել էր, որ Հայաստանի իշխանությունները կարող են այդ հարցով հանրաքվե անցկացնել՝ հարցնելով հայ ժողովրդի կարծիքը։ Նա նաև հավելացրել էր, որ այդ դեպքում Ռուսաստանը կներկայացնի «փափուկ, ինտելիգենտ և փոխշահավետ ապահարզան»։
Անդրադառնալով այդ հարցին լրագրողների հետ զրույցում, Նիկոլ Փաշինյանը նշել է, որ այդ թեմայով աշխատանքային մակարդակում քննարկումներ եղել են ՌԴ նախագահի հետ։
«Մենք աշխատանքային հարաբերություններ ունենք ՌԴ նախագահի հետ՝ հիմնված փոխադարձ վստահության վրա։ Ամենասուր հարցերը մենք քննարկել ենք շատ հանգիստ, հարգալից, բարեկամական մթնոլորտում՝ փաստարկների ու փաստերի վրա հիմնվելով։ Ես այդ տրամաբանությամբ շարունակելու եմ»,- ասել է վարչապետը։
