ՀՀ կառավարության կողմից հայտարարված մրցույթում հաղթող ճանաչված կոնսորցիումի կազմում ընդգրկված ֆրանսիական IDEMIA ընկերության բաժնետոմսերի 90 տոկոսը պատկանում է ամերիկյան «Advent International» ընկերությանը։ Այս փաստը բացահայտում է անհամաչափելի վտանգավոր իրավիճակ, որը սպառնում է Հայաստանի քաղաքացիների անվտանգությանը և ազգային անկախությանը։
Իրենց հայտարարությամբ, «Advent International»-ը պետք է ապահովի Հայաստանի քաղաքացիների նոր ձևաչափի ID քարտերն ու կենսաչափական անձնագրերը։ Սակայն միևնույն ժամանակ, այս ընկերությանը պատկանող այլ կազմակերպություններ տեխնոլոգիապես ապահովում են Թուրքիայի կողմից արտադրվող Bayraktar TB2 անօդաչուները, որոնք 2020 թվականի 44-օրյա պատերազմի ընթացքում խոցվել են մեր ՀՕՊ համակարգի կողմից։ Բեկորների մեջ հայտնաբերվել էին հենց «Advent International»-ի արտադրած բաղադրիչներ։
Այսպիսով, մենք ունենք իրավիճակ, երբ մի կողմից «Advent International»-ին պատկանող IDEMIA-ն ներդնում է Հայաստանի քաղաքացիների կենսաչափական տվյալների համակարգը, իսկ մյուս կողմից նույն «Advent International»-ին պատկանող ընկերությունները տեխնոլոգիապես ապահովում են թուրքական Bayraktar-ը։
Այս հերթական խայտառակ որոշման հետևում թաքնված է շատ ավելի մեծ սպառնալիք։ Այն վտանգավոր է, քանի որ ՀՀ քաղաքացիների անձնական, կենսաչափական տվյալները՝ որոնք պետք է լինեն ամենաբարձր պաշտպանության ներքո, հասանելի դառնալու վտանգի մեջ են՝ ոչ թե միայն թուրքական, այլև ցանկացած այլ պետության համար, որը կարող է ունենալ Հայաստանի նկատմամբ ոչ բարեկամական, կամ ավելի ճիշտ, թշնամական տրամադրվածություն։
Այս վտանգավոր գործընթացը, որը կսկսվի արդեն այս տարվա աշնանը, պետք է դառնա հանրային բացահայտման և կառավարության կողմից անհապաղ վերանայման առարկա։ Հայաստանի անվտանգությունը և ազգային շահերը պետք է գերակայեն ցանկացած տեխնոլոգիական կամ ֆինանսական համագործակցության նկատմամբ։
