Հարցազդրելով քաղաքացու մտահոգությունը՝ Հայաստանի վարչապետ Նիկոլ Փաշինյանը հաստատեց, որ Հայաստանի ինքնիշխան տարածքից ոչինչ չի հանձնվելու։ Նրա խոսքով՝ հանձնվելիք տարածքները ադրբեջանական են։
Այս հայտարարությունը հանգեցրել է լայն հասարակական քննարկումների, քանի որ այն հակադրվում է նախկին հայտարարություններին, երբ Փաշինյանը Շուռնուխում եւ Կիրանցում հանձնելու էր սեփականության իրավունքով քաղաքացիներին պատկանող տարածքներ՝ պնդելով, թե դրանք հայկական չեն։
Հիշեցնենք, որ 2024 թվականի գարնանը, առանց սահմանազատման հանձնաժողովների կանոնակարգը հաստատելու, Կիրանց գյուղին պատկանող, Կադաստրի կոմիտեից տրված սեփականության վկայականներով 58 անշարժ գույք՝ մոտ 15 հեկտար տարածք, միակողմանի կերպով, ապօրինորեն հանձնվեց Ադրբեջանին։ Այդ հողերի տերերին կառավարության գաղտնի որոշումով դրամական փոխհատուցումներ տրվեցին, որոնց չափը որոշվել է կամայականորեն եւ ոչ համաչափ։ Կիրանցից 6 ընտանիք, որոնց հարազատները զոհվել են հայրենի գյուղի սահմանները պաշտպանելու ժամանակ, սկզբունքորեն հրաժարվել են այդ փոխհատուցումներից։
Փաշինյանը, որպեսզի հիմնավորի հողերի հանձնումը, հիշեցրեց Արծվաշենի մասին՝ պնդելով, որ այն Հայաստանի Հանրապետության ինքնիշխան տարածք է, եւ Հայաստանը չի կարող դրանից հրաժարվել։ Նա նշեց, որ խոսքը վերաբերում է ադրբեջանական երեք տարածքների՝ Բարխուդարլի, Խեյրիմլի եւ Սոֆուլուի հանձնմանը։
Խեյրիմլին Կիրանց գյուղին կպած փոքր գյուղ է, որի տարածքը՝ քանդված տներով, 1990-ական թվականների սկզբից գտնվում էր ՀՀ զինված ուժերի վերահսկողության տակ։ 2024 թվականի գարնանը այն արդեն իսկ հանձնվել է Ադրբեջանին։
Փաշինյանի կողմից որպես հանձնվելիք տարածք Բարխուդարլիի հիշատակումից կարելի է կռահել, որ ԱԺ ընտրություններով ՔՊ-ական իշխանության վերարտադրման դեպքում Ադրբեջանին են հանձնելու նշված 4 անկլավները։ Այդ 4 գյուղերի տարածքները հանձնելու հետեւանքով խախտվելու է Հայաստանի մյուս տարածքների կապը Սյունիքի հետ, Իջեւան-Նոյեմբերյան, Իջեւան-Բերդ տրանսպորտային հաղորդակցությունում մեծ դժվարություններ են առաջանալու, հանրապետության հյուսիս-արեւելյան տարածքների եւ Լոռու թիկունքն անպաշտպան է դառնալու, Հայաստանը սնուցող մայր գազատարը հայտնվելու է նորահայտ սահմանից 30 մետր հեռավորությամն վրա եւ այլն։
