Ինչպես հայտնի է դարձել, Երեւանի պետական համալսարանի դասախոս, քաղաքագետ Ալեն Ղեւոնդյանին առաջադրված մեղադրանքի հիմքում ընկած է ոչ թե այն գրառումը, որը տարածվում էր նրա ձերբակալության ժամանակ, այլ բոլորովին ուրիշ տեքստ՝ նույնքան անմեղ։
Ըստ ՔԿ-ի, վարչական հսկողության տակ գտնվող Ալեն Ղեւոնդյանը «իշխանությունը զավթելուն եւ սահմանադրական կարգը բռնի տապալելուն ուղղված հրապարակային կոչ» է արել։ Դատարանի որոշմամբ նրան արգելվել է հրապարակումներ անել, հավաքների մասնակցել եւ սոցցանցում «հաղորդակցվել»։
Մեղադրանքի հիմքում ընկած է հունիսի 2-ի գրառումը, որում Ալեն Ղեւոնդյանը խորհրդարանական ընտրությունների հետ կապված իր մտքերն էր արտահայտում։ Նա կոչ էր անում ընդդիմադիր ուժերին պատրաստվել «ամենից կոշտ հետընտրականի»։
«Ընդդիմադիրներ ջան, եթե դուք չեք պատրաստվում գալիք ԱԺ-ում ընդդիմադիրներ լինել, երեկվանից արդեն պետք է ինստիտուցիոնալ պատրաստ լինեք ամենից կոշտ հետընտրականի։ Նիկոլը կարմիր գիծ չունի, իր քաղաքական կենսագրությունը սկսել է 2008-ի մարտի 1-ին, արյամբ։ Հետո իբր տեղը չէին գտնում… Ես հույսս չէի դնի դրսի որեւէ օգնությանը, ավելին՝ դրսի օգնությունը հիմա քաղաքական վարկեր են հետո։ Դա ՀՀ-ի լուծարումն է։ Բանաձեւն էլ են արդեն ուրվագծել։ Սա պետք է հաշվի առնել։ Ի դեպ, Նիկոլի հետ են ռեգիոնալ ու եվրո մի քանի պետության հատուկ ծառայություններ։ ՀՀ արտաքին հետախուզական ծառայությունը՝ վկա։ Ի դեպ, հետընտրականի համար հատուկ մասնագիտականներ են պետք»,- գրել էր քաղաքագետը։
Այս գրառումը, որը պարզապես վերլուծական եւ կանխատեսող բնույթ էր կրում, դարձավ նրա ձերբակալության հիմնական պատճառը։
Այս իրադարձությունից հետո նույն օրը ձերբակալվեց նաեւ ԱԺ նախկին պատգամավոր Ռուբեն Հակոբյանը՝ նույն մեղադրանքով։
Նոր խորհրդարանը դեռ չի ձեւավորվել, սակայն ՔՊ-ում արդեն ընտրվել է ԱԺ նախագահ։
